Bu gün Azərbaycan İnsan Hüquqları Evinin nəzdində “İnsan Hüquqları Kitabxanası”nın açılışı olub. Kitabxanada azərbaycan, rus, ingilis dillərində 3000 adda insan hüquqları, demokratiya, gender bərabərliyi, münaqişələr mövzusuna həsr olunmuş kitablar toplanıb.

İnsan Hüquqları Evinin tərəfdaşı, Humanitar Tədqiqatlar Cəmiyyətinin direktoru Əvəz Həsənov “İnsan Hüquqları Kitabxanası”nın iş planı və malik olduğu kitablar barədə məlumat verib. Onun sözlərinə görə, təşkilatlar və fərdlər kitabxanaya kitablar təqdim edə bilər. “Kitabxana bütün təşkilatlar və insanlar üçün açıqdır. Kitabxana istifadəçilərə İnternetdən istifadə və kitabların surətinin çıxarılması üçün də şərait yaradır”.

Təqdimat mərasimində iştirak edən beynəlxalq təşkilatlar və müxtəlif insanlar kitabxanaya çoxsaylı kitablar hədiyyə edib.

Azərbaycan İnsan Hüquqları Evi 2007-ci ildə rəsmi olaraq Ədliyyə Nazirliyində qeydiyyatdan keçib və ölkədə fəaliyyət göstərən hüquq müdafiə təşkilatları üçün texniki imkanlar təqdim edən resurs mərkəzi rolunu oynayır. http://top7.az/default.asp?vr=az#anc4